Кадрәктә укучыларны тантаналы рәвештә «Юнармия»гә кабул иттеләр

Минзәлә районының Кадрәк төп гомуми белем мәктәбендә укучыларны «Юнармия» сафларына кабул итү тантанасы булды

— «Юнармия» сафларына 5 нче сыйныф укучыларын кабул иттек. Малайлар һәм кызлар «Юнармия» гимны астында киләчәктә илебезнең лаеклы, ышанычлы ил сакчылары булырга, илебезгә тугрылыклы булырга ант иттеләр, — дип хәбәр итте «Минзәлә-информ»га Кадрәк мәктәбенең директоры Энҗе Нәбиуллина.

Кадрәк мәктәбендә барлыгы 23 бала белем ала. «Юнармиядә» аларның унбише — 5 – 9 сыйныф укучылары катнаша. Кадрәк юнармиячеләре зур эшләр башкаралар: Советлар Союзы Герое Фәхрази Галиев мирасын кадерләп саклыйлар, Ватанны саклаучылар һәйкәлләренә шефлык итәләр, МХОда катнашучыларга гуманитар ярдәм җыюда һәм җибәрүдә актив катнашалар.