Түбән Юшадыда Яңа елга алтын туй белән котладылар һәм хөкүмәт бүләге тапшырдылар

Түбән Юшады авыл клубында 2024 елны озатуга һәм яңа 2025 елны каршылауга багышланган чара уеннар, конкурслар, биюләр һәм җырлар белән үрелеп барды.

Бу хакта «Нижне Юшадинский сельский клуб» ВК төркемендә клуб мөдире Наталья Чепкасова хәбәр итә. 

Авыл халкын бәйрәм белән Юшады авыл җирлеге башлыгы Илгиз Ханов котлады.

Ирле-хатынлы Егор һәм Хәмидә Никитиннарны алтын туйлары белән котладылар. Аларга Түбән Юшады авылы халкы исеменнән бүләк тапшырылды.

Көчле алкышлар астында җирлек секретаре Надежда Ивановага Татарстан Республикасы җирле үзидарә органнары эшчәнлегенең нәтиҗәлелеген күтәрүдәге казанышлары өчен Мактау грамотасы тапшырылды. 

Кичәдә шулай ук уеннар, конкурслар, биюләр булды, җырлар яңгырады. Кичә азагында оттырышсыз лотерея үткәрелде.